一到夏天,海灣同沙灘都變咗水上運動嘅天堂,風勢大啲嘅話仲會多一班人去海灘滑浪(Surfing)。而近年Wakeboard同Wakesurf亦非常受歡迎,但其實兩者之間有咩分別?邊個適合你多啲!應該學邊樣好?今次就為你講下呢兩項活動嘅分別!(新手記住睇到最後!!!)

 

相同之處

其實Wakeboard同WakeSurf原理上冇乜大分別,Wakeboard同WakeSurf都係靠快艇同與快艇相連嘅繩嚟玩嘅水上運動,不過兩者係裝備同技巧上都有好大分別!無論係Wakeboard定WakeSurf玩家都係承住快艇行駛時所造嘅浪,同時靠連住艘船嘅繩所牽引為動力,從而做到模仿滑浪嘅情況,所以就算係冇浪嘅日子都可以玩!而且活動中,參加者亦需穿著救生衣,就算唔識游水嘅朋友只要唔怕水,都一樣可以參加!

 

滑水 Wakeboard

滑水(Wakeboard)Wakeboard要求玩家穿著相連滑板嘅鞋,而鞋都會因應玩家嘅程度或者想玩嘅花式而有唔同,教練都會要求新手或者唔識游水嘅人士遊玩過程穿著救生衣(安全起見,有經驗人士都最好穿著救生衣)。由於有腳套限制,能做到嘅花式比較少,不過就相對易上手啲。

 

| Wakeboard入門起水教學:

 

1. 穿好裝備,搵出自己嘅重心腳以決定起水位置係船嘅左定右

2. 落水,面向船尾,而且面朝上躺係水上,雙手伸直捉緊繩嘅把手等待開船

3. 開船嘅時侯會感受到拉力,係呢個時侯就要胸口推向膝頭,然後腳踭向下壓,類似半蹲嘅動作

4. 慢慢扭向重心腳嘅方向,然後上身放鬆並慢慢企起身,保持微微曲腳

5. 成功企起身之後記住避免過於傾前或挨後,輕微扭動腰部就可以連同把手向該方向傾

6. 跌落水嘅時候記住一定、一定唔可以繼續捉住把手,跌入海嘅時候衝力好大如果捉住把手跌反作用力加上跌嘅衝力會令玩家好易拉傷,亦都會飲好多海水令喉嚨唔舒服

 

| Wakeboard 價錢:

Wakeboard價錢相對便宜,

大概$500 / 小時

Wakeboard導師的人數及時間建議:

3人 -> 2小時;

4人-> 3小時;

5-6人-> 4小時

以確保有足夠落水時間

(*一般wakeboard課程係按小時收費,

意思係例如一個人玩一個鐘會係$500,兩個人玩一個鐘都係$500,咁就可以朋友自己Share返費用,咁就每人只需$250/head)

 

無繩滑水(WakeSurf)

WakeSurf只需滑板並赤腳即可,並冇腳套限制。同樣教練都會要求新手或者唔識游水嘅人士遊玩過程穿著救生衣(安全起見,有經驗人士都最好穿著救生衣)。WakeSurf船速較慢,所需嘅體力消耗較少,所以較適合女仔(WakeSurf玩家同快艇只係 2至3米距離,啱晒想打卡嘅女仔)!因為起水後到穩定咗嘅時候可以放低把手,所以相對會比較自由,可以做嘅花式都比較多。起水技巧方面與Wakeboard差唔多,只係準備動作會有少少分別。

| WakeSurf入門起水教學:

 

1. 穿好裝備,搵出自己嘅重心腳以決定起水位置係船嘅左定右

2. 落水,面向船尾,而且面朝上躺係水上,重心腳放係有凸起果邊,開船前單手輕力捉住滑浪板,單手捉住把手

3. 開船嘅時侯會感受到拉力,係呢個時侯就要膝頭向內夾並以胸口推向膝頭,然後腳踭向下壓,類似半蹲嘅動作

4. 慢慢扭向重心腳嘅方向,然後上身放鬆並慢慢企起身,保持微微曲腳

5. 成功企起身之後記住避免過於傾前或挨後,輕微扭動腰部就可以連同把手向該方向傾,板尖儘量指向船尾以確保唔會遠離人造浪。

6. 穩定後可以示意船上嘅人幫手收返把手避免絆到自己 7. 跌落水嘅時候記住一定、一定唔可以繼續捉住把手,跌入海嘅時候衝力好大如果捉住把手跌反作用力加上跌嘅衝力會令玩家好易拉傷,亦都會飲好多海水令喉嚨唔舒服

 

可以飛去1:02!

| Wakeaurf價錢:

大概$800-$1000 / Hour 

Wakesurf導師的人數及時間建議:

3人 -> 2小時;

4人-> 3小時;

5-6人-> 4小時

以確保有足夠落水時間

(*一般wakesurf課程係按小時收費,

 

意思係例如一個人玩一個鐘會係$800,兩個人玩一個鐘都係$800,咁就可以朋友自己Share返費用,咁就每人只需$400/head)

 

Wakeboard/Wakesurf必備物品Checklist!

  1. 太陽油
  2. 太陽眼鏡
  3. 毛巾
  4. 更換衣服
  5. 拖鞋
  6. 防水相機
  7. 防水袋